ಒಂದು ಸಂಜೆ

ತೀರದಲ್ಲಿ
ಅಲೆಗಳ ಬದಿಯಲ್ಲಿ
ನೆಡೆಯುತ್ತಾ
ದೂರದ ದಿಗಂತ ನೋಡುತ್ತಾ
ಮುಂದೆ
ಮುಂದೆ
ಸಾಗಿದ್ದೆ. 
ಏಕೋ
ತಿರುಗಿ
ನೋಡಿದರೆ
ನನ್ನ
ಆ
ಮನಸ್ಸು
ಅಲ್ಲೇ
ಮರಳ ಮೇಲೆ ಕುಳಿತು
ಕಾಲವನು ದಾಟಿ
ಮುಸುಕಿನಾ ಸಂಜೆಯಲಿ
ಒಂದೇ ಸಮನೆ ಅಪ್ಪಳಿಸುವ ಅಲೆಗಳಲಿ
ಹಳೇ ನೆನಪುಗಳನು ತಡವಿ ತಡವಿ
ಸವಿಯುತಿತ್ತು ಬೇಯುತಿತ್ತು. 
ಹರಿದ ನೆನಪುಗಳ ಮುರಿದ ನಂಟ
ಹೇಗಾದರೂ ಮರಳಿನಿಂದಾದರೂ ಸರಿ
ಅಂಟಿಸಲು ಒದ್ದಾಡುತಿತ್ತು

ಓ ಮನಸೇ
ಬಾ
ಹೋಗುವ ಮುಂದೆ
ಇರಲಿ ನೆನಪಿನ ಕಂತೆ ಹಿಂದೆ

ನನ್ನ ನೋಡಿ
ತಿರುಚಿದ ನಗು ನಕ್ಕು
ಚೀಪಿದ ಒರಟೆ,
ಒಂತರ ರುಚಿ
ರಾತ್ರಿ ಅನ್ನ ನಿನ್ನೆ ಕುದಿಸಿದ ಸಾರು
ಏಕೋ ಈ ಎಲ್ಲ ತುಡುವು
ನನ್ನ ಬಿಡದು
ನೀ ಹೋಗು ಮುಂದೆ
ನಾ ಸ್ವಲ್ಪ ಇಲ್ಲಿ  ಕೂತು ಬಂದೆ

ಹೀಗೇ ಆ ಸಂಜೆ ರಾತ್ರಿ ಆಯ್ತು
ಮತ್ತೊಮ್ಮೆ
ನೆನಪಿನ ಲಗಾಮು
ನನ್ನ ಕೈಯಿಂದ
ಜಾರಿತ್ತು .